Creme brulee

Það er í raun alls ekki erfitt að gera þennan þekkta desert og þaðan af síður að gera hann sykurlausan. Hann í eðli sínu mjög ketóvænn ef við skiptum út sykri fyrir sætu enda meginuppistaðan rjómi og egg. Ég notaði laktósafrían rjóma í þessa uppskrift en fólk ræður því alveg, mér finnst laktósafríi bara fara betur í magann. Passið ykkur á að rjóminn sé ekki of heitur þegar hann blandast eggjunum og þeytið vel á milli. Sumir vilja koníak út í sitt creme brulee en aðrir vilja bara gott vanillubragð. Það er því bæði hægt að nota vanillustöng og skafa fræin úr eða nota vanillu extract (dropa). Mætti líka setja koníaksslettu með til að gera aðeins meira úmpf. Ég notaði svo Sukrin Gold sætu til að setja ofan á toppinn og hitaði með loga, en það má líka skella réttinum undir grill í 1-2 mín með sömu niðurstöðu og mikið einfaldara í rauninni.

innihald:

  • 5 eggjarauður við stofuhita
  • 500 ml rjómi, ég notaði laktósafrían
  • 1/4 tsk gróft salt
  • 1 tsk vanilluextract eða 1 vanillustöng klofin og skafið fræ úr.
  • 60 g sæta fínmöluð ( 5 msk ca)
  • 1 msk koníak, má sleppa
  • 60 g Sukrin gold til að setja á toppinn

aðferð:

  • Hitið rjóma salt, vanillustöng (ef hún er notuð) og 1 msk af sætu í potti þar til rjóminn fer að krauma örlítið en alls ekki láta sjóða.
  • Takið pottinn þá af hellunni og látið kólna. Ef notuð er vanilluextract þá má setja hana út í rjómann á þessu stigi málsins.
  • Þeytið eggjarauður og það sem eftir er af sætunni, um 4 msk þar til létt og ljóst.
  • Hellið rjómablandinu í mjórri bunu saman við eggjarauðurnar og þeytið 1- 2 á milli eða þar til allt er komið í skálina. Bætið koníaki við ef þið notið það og þeytið létt.
  • Hellið næst blöndunni í 6 skálar sem þola hita og setjið þær í eldfast mót í ofn. Hellið sjóðandi vatni í bakkann svo það nái upp á miðjar skálar og bakið á 160° í 25-35 mínútur.
  • Látið búðinginn kólna vel í ísskáp í lágmark 3 klst, best yfir nótt.
    Stráið síðan 1-2 tsk af Sukrin gold yfir hvern búðing áður en borið er fram og brennið með loga ef þið eigið slíkt tæki. Annars má hita ofn á grillstillingu og háan hita og skella skálunum undir grill í 2 mín til að bræða sætuna.
  • Berið fram beint eða skreytið með berjum, mintu og þeyttum rjóma,