Djöflaterta Lindu Ben

Linda Ben er ein af þeim sem ég dáist af á hverjum degi. Hún er ekki bara búin að endurgera hvert húsnæðið á eftir öðru án þess að brjóta nögl, heldur er hún ótrúlega fær í eldhúsinu, með myndavélina og bara brjálæðislega smart stelpa sem ég elska að fylgjast með. Hún bakaði núna Djöflatertu á Instagram sem vakti áhuga minn en mér finnst oft erfitt að gera súkkulaðismjörkrem sem er ekki of væmið og smjörað !! Hún notaði rjómaost í þetta krem og það gerir það mjög loftmikið og létt í sér. Ég spurði hana hvort ég mætti snara uppskrift yfir á sykurlausan máta og það var nú sjálfsagt. Ég smellti í eina köku og krem og já þetta er klikkað gott. Það er hægt að gera 2 x 18-20 cm botna úr deiginu eða hella því hreinlega í litla skúffu og baka þannig köku. Kremið yrði líka geggjað á súkkulaðkökuna úr kúrbítnum trúi ég en þessi var líka geggjuð svo bara prófið. P.S. Það væri hægt að nota möndlumjöl í stað kókoshveitis en þar sem egg eru misstór þarf að bæta í möndlumjöli ef deigið er of þunnt. Gott er að láta deigið hvíla í formunum í 15-30 mín áður en það er bakað. Mjölið dregur rakann betur í sig og kakan verður þéttari.

Uppfært: Ég minnkaði sætuna í kreminu og bætti við Xantahan gum í kökuna.

Innihald kaka:

  • 1 dós sýrður rjómi 36% eða 2 1/2 dl Ab mjólk
  • 1 dl olía ég notaði steikingarolíu frá Olifa, eða nota aðra bragðlausa olíu
  • 3 egg
  • 220 g sæta
  • 50 g kakó
  • 60 g kókoshveiti, hægt er að nota 180-200 g af möndlumjöli líka
  • 1 1/2 tsk lyftiduft
  • 1/2 tsk matarsódi
  • 3/4 tsk salt
  • 1 dl sterkt kaffi við stofuhita
  • 1 tsk Xanthan Gum

aðferð:

  • Hitið ofn í 170°hita með blæstri
  • Þeytið saman sýrðan rjóma, olíu og egg.
  • Blandið þurrefnum saman í skál, gott að fínmala sætuna og þessvegna öll þurrefnin áður en þau eru sett saman við.
  • Blandið þeim við eggjablönduna og að lokum fer kaffið saman við.
  • Bakið í 2 formum um 18-20 cm í þvermál eða notið eina litla skúffu til að gera einfalda köku. Látið deigið standa í 10-15 mín áður en formin fara inn í ofninn.
  • Bakið í 25-30 mín eða þar til pinni kemur hreinn upp úr botnunum.

innihald krem:

  • 300 g smjör, mjúkt
  • 150 g rjómaostur, hreinn Philadelphia
  • 100 g fínmöluð sæta, Sweet like sugar sett í blandara
  • 50 g kakó
  • 1 tsk vanilludropar
  • 4-5 msk volgt kaffi

aðferð:

  • Þeytið smjörið vel saman með K spaða í hrærivél þar til það er létt og ljóst.
  • Bætið þá við rjómaostinum og þeytið áfram, því næst sætu, kakói og vanilludropum.
  • Þeytið vel og lengi og bætið svo við 3-4 msk af volgu kaffi til að þynna kremið.
  • Setjið kremið á botnana eða skúffukökuna og njótið með bestu lyst.