Grísakótilettur og blómkál í brúnuðu smjöri í Thermomix

Nú vorum við fjölskyldan að koma heim frá Kaupmannahöfn sem er aldeilis mekka skandinavískrar matarmenningar og hef ég undanfarið reynt að tileinka mér að panta mat dananna frekar en að eltast við indverskan og ítalskan mat. Ég elska hænsnasalat og smörrebröd og brokkolísalatið klikkar aldrei. Síðasti hádegisverðurinn í þessari ferð var snæddur á Granola sem er einhversskonar samsuða af frönskum og dönskum hefðum. Ég pantaði t.d. geitaostasalat og svo Steak tartar og Mekkín fékk sér hønsesalatið góða sem var borið fram á rúgbrauði. Svo voru í boði Croque Monsieur samlokur og allt borið fram með fersku salati. Ég mun klárlega reyna við alla þessa rétti á næstunni en það sem stóð upp úr í þessari ferð var alveg klikkaður kartöfluréttur, já ég smakkaði hann en við fengum okkur þessa snilld á veitingahúsinu Boathouse sem er niðri við Nýhöfn. Hann er alveg hinum megin og þarf að rölta yfir brúnna til að komast þangað og umhverfið er geggjað. Alveg klikkað töff staður með svona Californian twist og hægt að panta asískt og steikur í bland ásamt risotto og hamborgurum. Ég ákvað strax að ég myndi gera lágkolvetna útgáfu af þessum kartöflurétt en nota blómkál í staðinn. Brúnað smjör var aðalsöguhetjan í þessum rétt og o boy hvað það munar miklu að nota það. Grísakótilettur voru svona uppistaðan en einnig er hægt að bera blómkálið fram með hverju sem er.

innihald:

  • 1 blómkálshöfuð
  • 3 msk sítrónusafi, bestur nýkreistur
  • 1/2 dl ristaðar möndlur, hægt að kaupa tilbúið t.d. Kims með havsalti, fæst í Nettó
  • 1 msk graslaukur
  • 3 cm blaðlaukur
  • 1/3 rauðlaukur
  • 100 g smjör

aðferð með Thermomix:

  • Brjótið blómkál niður í grófar greinar og setjið í eldunarkörfuna.
  • Setjið 400 ml af vatni í eldunarskálina og stillið á 20 mín/Varoma/hraði 2
  • Takið blómkálið úr körfu og látið vatnið leka úr eins og hægt er.
  • Setjið laukana í skálina ásamt sítrónusafa og saxið 5 sek/hraði 5
  • Skafið niður úr hliðum og bætið blómkálinu saman við
  • Saxið stutt 3 sek/hraði 5 og hellið blöndunni í skál
  • Grófsaxið möndlur með hníf
  • Saltið og piprið og dreifið ristuðum möndlum yfir.
  • Setjið smjörið í þykkbotna skaftpott og látið bráðna á nokkuð háum hita. Fylgist vel með þegar smjörið fer að freyða.
    Hrærið varlega í froðunni svo þið sjáið til botns. Þegar smjörið fer að dökkna og anga af hnetukeim þá slökkvið þið undir pottinum. Hellið svo brúnuðu smjörinu yfir blómkálið og hrærið vel í.
  • Ef þið eigið TM6 þá er hægt að nota Browned onions stillinguna sem kallar á 200 g af lauk. Uppskriftin er á Cookidoo
  • Setjið þá 200 g af smjöri í vél, sleppið olíunni og fylgjið leiðbeiningum á High temp. Vélin vinnur í 16 mín og smjörið brúnast í skálinni.
  • Hellið því yfir blómkálið þegar vélin er búin að vinna. Þrífið svo skálina bara upp úr heitu vatni og skánin fer úr.

Grísakótilettur í raspi:

  • 3-4 grísakótilettur, Stjörnugrís er alveg málið, góðar í marineringu líka en þó ekki nauðsynlegt
  • 60 g paremesanostur
  • 2 msk möndlumjöl
  • 2 msk mæjónes
  • Best á allt krydd eða Svínakjötskrydd

aðferð:

  • Setjið kótilettur í eldfast form og kryddið ef þær eru ekki í marineringu fyrir.
  • Blandið saman paremsan, möndlumjöli og mæónesi og dreifið yfir hverja sneið.
  • Setjið í 220° heitan ofn og steikið þar til raspið er gyllt og kótiletturnar eldaðar, yfirleitt um 15-20 mín. Ekki ofelda samt. Það er sniðugt að ausa vökvanum yfir kótiletturnar einu sinni á eldunartímanum.
  • Berið fram með blómkálinu og brúnuðu smjöri.
Fjótlegt að mylja þessar yfir blómkálið, fæst í NETTÓ