“Gulrótarkaka” með ekki einni einustu gulrót …

Já þessi er ótrúlega góð og krydduð og minnir algjörlega á gulrótarköku en þó inniheldur hún ekki gulrætur enda eru þær háar í kolvetnum sem við viljum forðast. Þessi er krydduð og dásamleg með djúsí rjómaostakremi og í hana nota ég möndlumjöl frá NOW sem kom ótrúlega vel út. Macadamiuhneturnar frá NOW eru geggjaðar í þessa og gefa gott bit. Kryddin sem ég notaði eru frá Kryddhúsinu og ég hreinlega elska þau. Rjómaostasmjörkremið er svo alveg nauðsynlegt á svona skvísutertu en þessi uppskrift miðast við einfaldan botn og krem en ég tvöfaldaði allt til að gera tveggja hæða tertu. Það var þó aðallega gert fyrir fallega mynd. Einföld uppskrift dugar alveg enda saðsöm og góð kaka.

Þessi færsla er unnin í samstarfi við Icepharma og NOW á Íslandi.

innihald:

  • 100 g kúrbítur með hýðinu
  • 60 g Macadamiuhnetur frá NOW
  • 2 egg
  • 2 msk kókosolía mjúk
  • 1 tsk kardemommudropar
  • 100 ml möndlumjólk ósæt
  • 180 g möndlumjöl frá NOW
  • 120 g sæta frá Good good, Sweet sweetness
  • 1 tsk vínsteinslyftiduft
  • 1/2 tsk gróft salt
  • 2 tsk kanell
  • 1/2 tsk engifer duft eða maukaður í krukku
  • 1/2 tsk matarsódi
  • 1/4 tsk negull
  • 1 tsk sítrónusafi

Vörurnar fást meðal annars á vefverslun systraogmaka.is

Macadamihnetur NOW

Möndlumjöl NOW

aðferð:

  • Ég notaði Thermomix til að blanda þessu öllu saman, ég byrjaði á að mauka kúrbítinn í 10 sek/hraði 6, setti svo hneturnar saman við og maukaði 10 sek/ hraði 6.
  • Blandaði næst öllum hráefnum saman við kökuna og hrærði rólega í 2 mín á hraða 4.
  • Það má að sjálfsögðu nota annarskonar blandara eða rífa niður kúrbítinn með rifjárni og saxa hneturnar, Thermovélin er bara svo öflug að hún tók allt deigið í einu lagi, meira að segja tvöfalda uppskrift.
  • Bakið í spreyjuðu formi eða silikonformi í 30 mín á 170° hita. Ef þið tvöfaldið uppskrift þá notið þið tvö form.

Krem:

  • 200 g rjómaostur
  • 200 g smjör
  • 100 g sæta frá Good good, fínmalið
  • 1 msk sítrónusafi
  • 2 tsk vanilludropar

aðferð:

  • Fínmalið sætuna í blandara svo hún líkist flórsykri.
  • Blandið saman smjöri við stofuhita og rjómaosti, bætið sætunni við, sítrónusafa og vanilludropum og þeytið. Gott að nota K-spaða í hrærivél ef þið eigið.
  • Ef krem skilur sig þá er það annaðhvort of heitt eða kalt. Ef það kurlast upp og nær ekki að blandast saman þá er hægt að fara með hárblásara á skálina og mýkja upp. Ef það er á floti og smjörið orðið fljótandi þá má setja ískalt blautt viskastykki utan um að kæla skálina niður á meðan hún þeytir. Það er alltaf hægt að bjarga smjörkremi.
  • Skreytið kælda kökuna með kreminu og fyrir þá sem vilja þá er hægt að lita hluta af smjörkreminu með grænu og appelsínu lit og sprauta gulrótum á kökuna eða búa til marsipan sem er í uppskrift hér
    https://mariakrista.com/marsipan-fra-grunni/