Kanel jólatré

Það sem er helsti gallinn við brauðin á lágkolvetnamataræðinu er vöntun á þessu “brauð” bragði sem er þá yfirleitt gerbragð sem við tengjum oftast við nýbakað brauð. Ég prófaði að gera fathead deig í dag og notaði pínu ger í það ásamt 1 tsk af hunangi til að kveikja í germynduninni og það var alveg geggjað. Gerið étur upp hunangið og sætuna og því ætti það ekki að hafa áhrif á blóðsykurinn. En fyrir þá sem eru viðkvæmir fyrir geri þá auðvitað sleppið því að nota. En hér er uppskriftin og útlitið er auðvitað fengið að láni hjá átrúnaðargoðinu Lindu Ben en hún var að sýna hvernig svona jólabrauðtré er gert. Ég reyndar þurfti ekki að fylla brauðið með ostum því deigið er nánast bara ostur, svo ég skar bara línur í það þegar ég hafði mótað deigið eins og jólatré og snéri upp á. Gott að nota olíu á puttana þegar verið er að vinna með ostadeig. Nota skal fínmalað möndlumjöl þetta fituskerta sem fæst frá Funksjonell. Þannig kom þetta allvega mjög vel út.

Ég prófaði að frysta brauðið beint úr ofninum og setti svo í ofn rétt áður en gestir komu og það kom vel út. Mætti líka frysta deigið útskorið og tilbúið og baka svo þegar hentar.

innihald:

  • 2 egg og 1 pískað egg til að pensla með
  • 50 g fituskert möndlumjöl Funksjonell, 10-30 g aukalega til að hnoða upp úr
  • 150 g rifinn ostur mosarella
  • 125 g rjómaostur í bláu boxunum
  • 1 kúfuð msk þurrger úr litlu bréfpokunum
  • 1 tsk hunang
  • 1 kúfuð tsk Xanthan Gum
  • 2 msk sæta
  • FYLLING:
  • 1 msk kanell
  • 2 msk sukrin gold

aðferð:

  • Blandið þurrefnum saman í skál og hrærið.
  • Setjið ostana í skál og hitið í örbylgjuofni eða í Thermomix þar til þeir hafa bráðnað vel saman.
  • Bætið þá eggjunum saman við og hunangi.
  • Hrærið vel áður en þurrefnin fara saman við svo engir ostakekkir séu í deiginu.
  • Hnoðið deigið vel saman og bætið við möndlumjöli eftir þörfum.
  • Bætið kanil og Sukrin gold saman við deigið og blandið gróflega saman við deigið.
  • Mótið nú útlínur á jólatréi og ég mæli með því að olíubera fingurnar áður.
  • Skerið línur inn að miðju en þó ekki í gegn sitthvoru megin við tréð og snúið svo upp á hverja “grein” alla leið upp á topp.
  • Penslið tréð með pískuðu eggi bakið í 200°C ofni með blæstri í ca 10-15 mín þar til gyllt og fallegt. Það má strá smá aukalega af kanil og sukrin gold í lokin en betra að hafa kanilinn í deiginu svo brauðið brenni ekki.

aðferð með Thermomix:

  • Setjið ostana í eldunarskálina, saxið 5 sek/hraði 6 ef það þarf og hrærið síðan, 4 mín / hiti 70° / hraði 2 eða þar til osturinn hefur bráðnað vel saman.
  • Bætið eggjum og hunangi saman við og hrærið áfram 1 mín / hraði 4
  • Þurrefnin, gerið, Xanthan Gum, möndlumjöl og salt fara næst í skálina og aftur hrært í 1 mín / hraði 4
  • Bætið við kanil og Sukrin gold og stillið á 20 sek / hraði 3
  • Veiðið deigkúluna upp úr skálinni með sleikju, setjið á silikonmottu og hnoðið aðeins upp með auka möndlumjöli, gott er að nota olíu á fingurnar til að vinna deigið.
  • Fletjið út með fingrum og mótið útlínur á jólatré, skerið inn að miðju línur og snúið upp á hverja grein alveg upp á topp.
  • Pískið með eggi, kryddið með kanil og sukrin gold og bakið á 200°C með blæstri í ca 10-15 mín.
  • Mér finnst gott að bræða smá súkkulaði með rjóma og smjöri, bæta við pínu súkkulaðistevíudropum og hella yfir brauðið, eflaust gott að nota súkkulaðismjör frá Good good eða Cavalier líka. Ég strái svo karamelluhnetukurli yfir sem ég á alltaf. Uppskriftin er hér https://mariakrista.com/hnetunammi-i-thermomix-6/ , hnetunammi.