Ketópepp 10 ráð

Nú er ég með lokaða grúppu á facebook sem er fyrir alla sem hafa komið á námskeiðin mín hvort sem það er hér heima eða á vefnum. Ég setti inn smá peppumræðu um daginn þar sem skólar og rútína er að hefjast og einhverjir búnir að ákveða að taka mataræðið sitt í gegn, dusta rykið af lífstílnum eða eru búnir að vera staðfastir í langan tíma og vilja fá smá upprifjun eða réttara sagt uppörvun. Ég ákvað að deila þessu peppi mínu á instagram og snapchat líka og ætla að henda þessu hér inn líka. Ég dæmi engan, þú ert leikstjórinn í þínu lífi, ég er hér til að leiðbeina og peppa ekki rífa niður. En ef þú vilt fá nokkur tips með hvernig er gott að byrja á Ketó eða LKL þá mæli ég með að lesa áfram.

Nr 1.

Borðið einfaldan mat, egg, kjöt, avocado, álegg, fisk, smjör, sviðasultu, harðfisk, grænt grænmeti, steikið stóra pönnu af grænmeti með smjöri, sveppir tómatar, kúrbítur, paprika, tómatar, ólífuolía. Notið kolvetnaskertar mjólkurvörur og ég elska laktósafríar mjólkurvörur líka þar sem þær fara betur í magann, ég spara rjómann í kaffið en leyfi mér samt í ákveðna rétti og deserta í staðinn. Notið chiafræ, hampfræ, sólblóma, graskersfræ kókosolíu, avocadoolíu… þetta er svo einfalt í grunninn. En ekki bíða, byrjið strax.

nr 2.

Fyllið magann af næringu, vatni og ef þið eruð slöpp (oftast sykur og bjúgur að kveðja kroppinn) þá mæli ég með súputening eða dufti t.d frá Knorr, eitt bréf í heitt vatn og smá smjörklípa, jafnvel harðsoðið egg, þetta er hin mesta orkubomba. Ekki gleyma svo vítamínum og lýsi.

nr 3.

Ég mæli með að missa þig alveg í uppskriftaflórunni fyrst um sinn. Það þarf alls ekki að baka flóknustu kökuna af blogginu mínu eða hjá öðrum ketógúrum eða snúa heitustu uppskriftinni á internetinu í hollustuköku fyrstu vikuna.

nr 4.

Náið tökum á ykkur í litlum skrefum, reynið að hætta að borða eftir 19/20 á kvöldin sirka og verið dugleg að vökva ykkur. Einfaldar heimagerðar fitubombur og kókoskúlur er fínt að eiga, en bíðið með að kaupa allt sykurlausa súkkulaðið í búðinni þar til þið hafið náð tökum á sykurpúkanum. Þótt að þetta sé allt sykurlaust og fínt þá getur það gabbað okkur og heilann sem er mögulega á kafi í sykurleðju og hugsar ekki skírt.
Smá dramatísk lýsing en þið fattið.

nr 5.

Brie ostsneið og pepperoni eða salami getur slökkt á sætuþörfinni, prófið bara ef þið trúið mér ekki. Drekkið ískalt vatn, smá edik út í eða sítrónusafi nammm. Ég mæli svo með að setja stórt glas af vatni á náttborðið, drekka áður en þið standið upp úr rúminu á morgnana. Hvílum mallakútinn aðeins lengur og lengjum föstu. Ég brýt mína föstu með bulletproof eða eins kolvetnaskertum matvörum og ég get til að dagurinn byrji með jafnan blóðsykur.

nr 6.

Ekki byrja á ketó, lkl, herbalife, föstum, safakúr eða hvað sem það er af því að einhver segjir ykkur að gera það. Þú þarft að mæta í eigin persónu í vinnuna annars ertu rekinn ekki satt.

nr 7.

Ekki láta heldur neinn annan hafa áhrif á hvað þú ert að gera fyrir þig, hvort sem það er ketó, lkl , föstur, herbalife, safakúr eða eitthvað annað. Þú átt þig skuldlaust og ert að gera það sem þér finnst henta þér vel. Þinn líkami, þinn tími hér á jörð.

nr 8.

Það tekur jafnlangan tíma að borða soðið egg og einn kleinuhring !! Hvað dugar raunveruleg orka úr hvoru fyrir sig lengi ?

nr 9.

Prófið að byrja að stunda einhverja hreyfingu t.d. 30 mín á dag, sund, ganga, skokk, fjallaferð, golf, jóga, dans.. bara eitthvað til að koma blóðinu af stað. Engar öfgar samt því of mikið álag á kerfið getur haft þau áhrif að maður gefst upp á öllu klabbinu.

nr 10.

Og eitt að lokum, það er alveg sama á hvaða mataræði þið farið eða hvaða aðferð þið notið til að fækka aukakílóum eða bæta heilsuna, “it wont stick” nema þú sért staðfastur og viðhaldir góðum venjum í það minnsta 95%. Ef einhver dettur meðvitað af sporinu og fer aftur að gúffa sykur og rusl þá er það ekki mataræðinu að kenna og þú þarft að taka það á kassann og gangast við því með sátt í hjarta.

Það er hinsvegar miklu auðveldara að halda sér á sporinu ef maður sleppir því bara að fá sér sykur og drasl sem þið vitið að gerir líkamanum enga greiða. Ég hef alveg komist að því að ef ég leyfi mér öðru hvoru þá dett ég fljótt í það og fyrir mig er miklu auðveldara að sleppa því bara alveg og njóta alls hins góða í mataræðinu sem gerir mér gott. Vellíðanin er ekki hægt að verðleggja og trompar allt sykurjukk í veröldinni. Trúið mér ég hef verið þar.