Kjötbollur með indverskum keim

Hversu gott er að borða nýsteiktar kjötbollur með sósu. Mjög gott.. en að prófa að gera indverskar kjötbollur með karrýsósu …nomm.

Ég gerði þessar sérstaklega fyrir son minn því hann elskar karrý og kjötbollur svo því ekki að blanda þessu tvennu saman. Kjötbollurnar gerði ég bara í skál, kryddaði og setti ost saman við. Ég eldaði þær svo í Airfryer en að sjálfsögðu má steikja þær á pönnu. Það er hægt að klára þær í ofni í eldföstu formi og jafnvel hella sósunni yfir í lokin þegar borið er á borð.

Innihald bollur:

  • 500 g nautahakk eða annað hakk að eigin vali
  • 1 egg
  • 1 msk möndlumjöl, fituskert t.d. í grænum pokum
  • 1 tsk cumin malað, ég nota frá Kryddhúsinu
  • 1/2 tsk chilli malaður , ég nota frá Kryddhúsinu
  • 50 g rifinn ostur
  • 1/2 tsk hvítlauksmauk eða2 geirar smátt skornir
  • 1 tsk gróft sjávarsalt
  • 2 msk fínt skorið kóríander, má sleppa ef þið fílið ekki kóríander

aðferð:

  • Setjið öll hráefni saman í skál.
  • Notið hendurnar eða sleif til að blanda hakkinu vel saman við kryddin. Ég nota yfirleitt bara hendur og einnota gúmmíhanska.
  • Mótið bollur og steikið á pönnu með olíu, ef þið eigið Airfryer þá set ég bollurnar í skúffuna og elda á 180° í ca 20 mín og hristi öðru hvoru upp í bollunum.

Sósa:

  • 250 ml vatn
  • 1 súputeningur að eigin vali, nauta eða kjúklinga
  • 1 msk karrý, veljið gott karrý t.d. Kryddhúsið
  • 1 dl rjómi, mætti líka nota kókosmjólk eða möndlumjólk
  • 2 msk ólífuolía
  • 1/2 hvítlauksostur
  • 1 tsk Fiber síróp gold, má sleppa en kom vel út

aðferð:

  • Hitið vatn og súputening, bætið svo við olíu, rifnum hvítlauksosti til að flýta fyrir eldun.
  • Kryddið og látið suðuna koma upp. Sósan þykknar vel þegar osturinn er bráðnaður, þynnið þá með rjóma. Bragðbætið örlítið með sykurlausa sírópinu ef þið viljið.
  • Salt og pipar eftir smekk.
  • Það er snilld að bera þetta fram með blómkálsgrjónum og naan brauði.

naan brauð:

  • 90 g kókoshveiti
  • 10 g sesammjöl frá Funksjonell
  • 1/2 tsk lyftiduft
  • 2 eggjahvítur um 60 g
  • 1 tsk salt
  • 2 tsk maukaður hvítlaukur
  • 15 g fínmalað husk
  • 200-250 ml soðið vatn

aðferð:

  • Blandið þurrefnum saman og bætið svo eggjahvítum saman við.
  • Pískið deigið þar til það er vel blandað og hellið soðnu vatni saman við þar til deigið er slétt og fellt og helst saman í kúlu
  • Notið blauta fingur til að móta 6 kúlur úr deiginu.
  • Fletjið út hverja kúlu með fingrum og steikið á vel heitri pönnu, það er mjög gott að setja smá smjör og hvítlauk á pönnuna
  • Látið brauðin brúnast vel á hvorri hlið og takið til hliðar.
  • Ef það þarf að hita þau upp er gott að skella þeim í ofn rétt áður en þau eru borin fram en þá fá þau enn stökkari áferð.
  • Ég hellti hvítlauksolíu yfir brauðin og það er algjör draumur