Pizza með geitaosti

Með árunum er ég er orðin meira svag fyrir pizzum með framandi áleggi og svo breyttist eitthvað þegar ég fór að borða lágkolvetna og ég fékk allt í einu æði fyrir geitaosti. Þetta hefur ýtt mér út í allskonar tilraunir og nú síðast bjó ég til pizzu með geitaosti, lauk og basiliku ! Já þetta var ferlega gott og létt í maga en ég notaðist við grunnuppskrift af Fathead deigi en breytti aðeins, auðvitað … Meira að segja eiginmaðurinn var sáttur við þessa, þrátt fyrir að ekkert kjöt væri á henni , né pizzusósa. Það myndi eflaust passa vel að nota beikon á þessa fyrir kjötáhugafólkið.

Innihald Botn:

  • 180 g mosarella ostur
  • 2 msk rjómaostur
  • 60 g möndlumjöl
  • 20 g hörfræmjöl ( má sleppa og bæta við 20 g möndlumjöl)
  • 1 tsk edik
  • 1 egg
  • 1/2 tsk salt

Aðferð:

  • Hitið osta í örbylgjuofni í 30 sek í senn, þar til þeir eru orðnir vel fljótandi.
  • Bætið við eggi, ediki og mjöli og hrærið kröftuglega.
  • Fletjið út á plötu með smjörpappír, pikkið aðeins í deigið með gaffli.
  • Bakið við 200°hita með blæstri í 10-15 mín.

innihald álegg:

  • 5 msk geitaostur
  • sletta af rjóma
  • 1 gulur laukur
  • 2 msk smjör
  • knippi basilika fersk
  • ruccola
  • balsamikedik

aðferð:

  • Þynnið geitaostinn út með rjóma svo hægt sé að smyrja honum á pizzubotninn.
  • Steikið lauk upp úr smjöri þar til hann karmelliserast, hellið dash af balsamikediki yfir.
  • Dreifið ostinum yfir forbakaðann pizzabotninn, setjið laukinn yfir og bakið í 5 mín í ofni, bara rétt til að hita upp.
  • Saxið basiliu yfir ásamt smá ruccola, saltið og piprið og dreifið pínu sykurlausu sýrópi yfir allt ef þið viljið.
  • Þessi er mjög létt í maga og öðruvísi á bragðið.