Sítrónu baka með marengs

Já svona “Lemon marengue pie” er oft mjög freistandi á kaffihúsunum og það var einmitt eitt slíkt sem stöllur mínar fengu sér í Dublin nú á dögunum meðan ég slefaði yfir herlegheitunum. Ég ákvað þarna að reyna við þessa heima enda hef ég gert bæði marengs, lemoncurd og böku í öðrum uppskriftum svo því ekki að skella þeim saman í eina. Hér er útkoman. Það kom best út að kæla vel bökuna áður en lemoncurdinu var hellt ofan í. Leyfið curdinu að setjast og stífna aðeins í ískáp áður en marengs er sprautað yfir og bakað í ofni í 10 mín.

innihald baka:

  • 120 g möndlumjöl
  • 1 msk kókoshveiti
  • 100 g macadamiuhnetur
  • 60 g fínmöluð sæta Good good
  • 1/3 tsk salt 
  • 50 g smjör, ósaltað, kælt og brytjað niður í litla bita
  • 1 eggjahvíta eða um 20 g

aðferð:

  • Hitið ofninn í 170° með blæstri.
  • Smyrjið bökuform að innan með smjöri, best að nota form með lausum botni, líka hægt að nota silikon form t.d. lítil hjörtu og þrýsta þá deiginu upp á kantana.
  • Blandið saman í matvinnsluvél, möndlumjöli og macadamiuhnetum, sætu og salti. Bætið næst köldu smjörinu saman við og blandið vel saman. Thermomix 20 sek / hraði 6, smjörið saman við og endurtakið.
  • Eggjahvítan fer síðast út í og aftur blandað. Gott að kæla deigið í 1-2 klt ef þið hafið tíma, annars er hægt að dreifa deiginu í smurt kökuformið og þrýsta því vel upp á kantana. Það er líka hægt að fletja út kælt deigið milli tveggja laga af smjörpappír og leggja formið yfir og hvolfa því.
  • Stingið með gaffli í botninn á nokkrum stöðum. Bakið í ofni í 15 mín eða þar til kantarnir fara að verða gylltir. Takið út og látið kólna (skelin harðnar við kælingu).
  • Blandið fyllinguna á meðan bakan kólnar.

lemoncurd fylling:

  • 180 g ljóst Fiber sýróp
  • 1 tsk Xanthan gum
  • 3-5 sítrónur
  • 120 g smjör ósaltað
  • 3 egg

aðferð bæði í Thermomix og án:

  • Setjið sýrópið og börk af einni sítrónu í matvinnsluvél og mixið saman. Ef notast er við Thermomix þá stillið þið á 10 sek / hraði 4.
  • Bætið við smjöri, eggjum, Xanthan gum og 150 g af sítrónusafa í skálina, ef þið notið ekki Thermomix þá má nota venjulegan pott. 
  • Hitið á meðalháum hita og hrærið stöðugt í pottinum í 15-20 mín. Í Thermo er stillt á 20 mín / hiti 90° / hraði 2 án þess að hafa tappann í lokinu á.
  • Eftir eldunina er allt sett á fullt í Thermomixinu eða 25 sek / hraði 6. Ef þið notið aðrar aðferðir þá má t.d. nota töfrasprota til að mixa allt vel saman.
  • Hellið Lemoncurdinu í bökuskelina og gott að nota sigti til að sigta frá sítrónutrefjar og mögulega steina. Látið stífna aðeins í ískáp.

marengstoppur:

  • 130 g ljóst sýróp Fiber
  • 45 g eggjahvíta
  • 60 g fínmöluð sæta, Good good t.d. í blandara
  • 1 tsk vanilluduft eða vanilludropar
  • nokkur saltkorn

aðferð:

  • Byrjið á því að píska eggjahvítu, sætu, vanillu og sýrópi í hrærivélaskál yfir vatnsbaði.
  • Þegar blandan er farin að þykkna aðeins og hvítna þá má færa skálina yfir í hrærivél og þeyta í þónokkrar mínútur eða þar til þykkt marengskrem myndast.
  • Setjið marengs í sprautupoka og sprautið hæfilegum toppum ofan í bökuna yfir lemoncurdið.
  • Bakið nú bökuna á 180° með blæstri í 10 mín.
Rétt áður en ég tók myndina þá datt sítrónu raspurinn ofan á marengsinn haha þetta getur gerst en bragðið er samt gott.
Gerði aðra tilraun og nú lenti enginn raspur ofan í kökubeyglunni 🙂