Sörur já sykurlausar

Það er vel hægt að gera sörur sykurlausar og ég hef prófað bæði með sírópi og sætu. Hér er uppskrift sem hefur ekki klikkað hingað til á hefðbundin hátt en núna prófaði ég að nota bæði sætuna og sírópið í Thermomix útgáfunni. Sumir elska kaffibragð og ég geri það en það mætti sleppa kaffiduftinu fyrir þá sem ekki fíla það. Ég fékk sirka 60 stk úr þessari uppskrift.

Innihald Botnar:

  • 120 g ljóst möndlumjöl mega vera hakkaðar í bland
  • 120 g Sweet like sugar sæta, fínmöluð
  • 4 eggjahvítur
  • 1/4 tsk salt
  • 1/2 tsk möndludropar ( má sleppa en gerir mikið) sett í lokin, takk Fríða Dóra

aðferð:

  • Stífþeytið hvítur og salt, ég mæli alltaf með því að skola skál með ediki og þurrka vel á eftir. Blandið fínmalaðari sætunni saman við í pörtum og þeytið alveg þar til hægt er að snúa skálinni.
  • Blandið þá möndlumjölinu varlega saman við.
  • Setjið blönduna í sprautupoka eða notið 2 skeiðar við að búa til marengstoppa á bökunarpappír eða þartilgerðar silikonmottur sem oft fást með merkingum fyrir hverja köku.
  • Bakið á ca 140°hita með blæstri í um það bil 15-20 mín eða þar til hægt er að snerta kökurnar og þær orðnar aðeins gylltar í kantana.
  • Takið plöturnar úr ofni og látið kökurnar kólna á bakinu.

Innihald krem:

  • 240 g mjúkt smjör
  • 4 eggjarauður
  • 80 g Sweet like sugar sæta fínmöluð eða (40 g sæta og 40 g sykurlaust síróp, kom vel út)
  • 2 tsk kakó
  • 1 msk skyndikaffiduft

aðferð krem:

  • Þeytið eggjarauður þar til ljósar, bætið sætu og sírópinu við ásamt kaffidufti og kakó og þeytið áfram.
  • Bætið svo mjúku smjörinu saman við og þeytið áfram þar til kremið er létt og ljóst.
  • Smyrjið hvern kökubotn og myndið lítið fjall, það er þægilegt að sprauta doppum á hverja köku og dreifa síðan úr kreminu með teskeið.
  • Frystið kökurnar í að minnsta kosti 30 mín.

Hjúpur:

  • Cavalier dropar sykurlaust súkkulaði eftir þörfum
  • 3 dropar Nicks karmellustevía, má sleppa

Hjúpur:

  • Hitið súkkulaðið yfir vatnsbaði, það má þynna með slettu af olíu, t.d Mct og svo fannst mér gott að setja 3-4 dropa af Nicks stevíu með karamellubragði út í.
  • Hjúpið hverja köku beint úr frystinum og kælið.

aðferð með thermomix:

  • Þrífið skálina vel með ediki áður en byrjað er á botnunum
  • Malið sætu í eldunarskál í 8 sek/hraði 8
  • Bætið eggjahvítum við og þeytið með fiðrildaspaða án loks 8 mín / hiti 40°/hraði 4
  • Blandið möndlumjölinu varlega saman við marengsinn og setjið deigið í sprautupoka eða notið tvær skeiðar til að gera doppur á bökunarpappír.
  • Bakið á 140° með blæstri í ca 15 mín. Takið út þegar botnar fara að gyllast og látið kólna á borði.
  • Snúið botnunum á bakið og látið þorna aðeins og stífna.

Aðferð Krem með Thermomix:

  • Malið sætu, skyndikaffi og kakó í hreinni eldunarskál, 8 sek / hraði 8
  • Bætið eggjarauðum saman við ásamt sýrópi og þeytið í 2 mín með þeytara /hraði 4
  • Bætið mjúku smjöri saman við ásamt stevíu og þeytið áfram 3 mín/ hraði 3.5
  • Setjið skálina í kæli ef þið smyrjið ekki strax. Annars má smyrja á botnana og frysta.

Hjúpur í Thermomix:

  • Setjið sykurlaust Cavalier súkkulaði eftir þörfum í skálina.
  • Saxið súkkulaðið 8 sek / hraði 8
  • Stillið á 4 mín / 50°hita/ hraði 2
  • Skafið niður úr hliðum og hjúpið sörurnar beint úr frystinum.