Súkkulaðimús í sparifötum

Ég átti afmæli á gamlaársdag og ákvað því að bera fram súkkulaðimús á tvo vegu en við vorum að fá nýtt hvítt Cavalier súkkulaði í búðina fyrir jólin og það varð að prófa það en ekki hvað. Ég notaði uppskrift af brownie hér af síðunni í botninn en í raun má nota hvaða lágkolvetnabotn sem er til að hafa sem grunn. Það má auðvitað gera bara hefðbundna mús í skálar en mér fannst eitthvað smart að gera svona tertu og notaði því sitthvort matarlímsblaðið í “mýsnar” eða músina sem fór ofan á. Þetta var ekki flókinn réttur og í raun bara mjög auðvelt allt saman, nema bíða eftir að kakan væri klár.

innihald:

  • 180 g dökkt súkkulaði Cavalier
  • 180 g ljóst súkkulaði Cavalier
  • 500 ml rjómi
  • 2 matarlímsblöð
  • 4 egg
  • 2 kúfaðar msk Sukrin Melis
  • vanilludropar eða koníak í brúnu músina, má sleppa

aðferð:

  • Bakið súkkulaðibotn skv uppskrift í háu springformi, t.d. Brownieuppskrift hér á blogginu, kælið
  • Þeytið rjómann og takið til hliðar.
  • Setjið egg í skálina og sætu og þeytið vel eða þar til létt og ljóst.
  • Setjið matarlím í ískalt vatn og látið mýkjast upp í 5 mín ca.
  • Bræðið súkkulaði í vatnsbaði, þegar það er bráðnað þá er helmingurinn af eggjablöndunni þeyttur saman við dökka súkkulaðið og hinn helmingurinn við ljósa.
  • Bræðið matarlímið í örbylgjuofni í nokkrar sek og deilið niður á sitthvora blönduna. Það er ekki nauðsynlegt að nota matarlím en ef kakan á að standa sjálf og vera stíf og fín er það betra.
  • Hrærið matarlíminu saman við eggja og súkkulaðiblönduna og að lokum skiptið þið rjómanum niður í hvora skál og hrærið með sleikju þar til allt er mixað saman.
  • Mér fannst gott að setja plastfilmu í hliðina á kökuforminu eða nota þartilgert ostakökuplast sem hægt er að smeygja utan um kökubotninn.
  • Hellið nú súkkulaðimúsinni yfir botninn og sléttið úr. Kælið í nokkrar mín og endurtakið með hvítu músina.
  • Kælið kökuna helst yfir nótt og skreytið daginn eftir með þeyttum rjóma, berjum og súkkulaði.
  • Þessi er bomba, B.O.B.A.