Súkkulaðisprengjur með mjúkri fyllingu

Þessi færsla er unnin í samstarfi með MS sem útvegaði mér hráefni í þessar dásamlegu súkkulaðikökur sem bragð er af.

Það er fátt betra en ljúffeng bollakaka með súkkulaðibragði finnst mér en ég ákvað að fara skrefinu lengra og hafa mjúka fyllingu innan í sem gefur henni þetta extra góða bragð. Ég gerði uppskrift af trufflum sem komu ótrúlega vel út með rommbragði og í kremið notaði ég smá kaffiduft. Þetta er því dálagleg sprengja með kaffibollanum svona á nöprum sunnudegi.

innihald kökur:

  • 4 egg
  • 100 g sæta sykurlaus Good good, eða Sukrin Gold
  • 1 dl rjómi MS
  • 1 dl grísk jógúrt MS
  • 40 g smjör brætt
  • 1 tsk lyftiduft
  • 1 tsk matarsódi
  • 50 g kókoshveiti
  • 20 g kakó
  • 1/2 tsk salt
  • 30 ml heitt kaffi uppáhellt eða soðið vatn
  • 1 tsk vanilludropar

aðferð:

  • Þeytið egg og sætu saman, því næst rjóma, grísku jógúrtina, smjör og vanilludropana.
  • Bætið að lokum þurrefnum saman við. Látið deigið standa í smá tíma.
  • Deilið nú í 12 múffuform. Ágætt að pensla aðeins formin að innan með kókosolíu því kókoshveitið á það til að festast í bréfinu.
  • Bakið í 20 mín á 170° hita.

innihald trufflu-fylling:

  • 180 ml rjómi
  • 50 g smjör
  • 170 g sykurlaust súkkulaði, ég notaði dropana frá Cavalier
  • 40 g Sukrin Melis eða fínmöluð Good good sæta
  • 2 tsk koníak eða 1 tsk rommdropar eða nota mintudropa
  • 1/2 tsk vanilla

aðferð:

  • Setjið súkkulaði í skál og setjið til hliðar.
  • Setjið rjóma, smjör og vanillu í pott og látið suðuna koma upp.
  • Hellið þá blöndunni yfir súkkulaðið, bætið sætunni við og hrærið í þar til allt hefur leyst upp. Bragðbætið með koníaki eða rommdropum ef þið viljið frekar.
  • Látið blönduna kólna í ískáp eða frysti með filmu yfir og þegar hún er orðin stíf þá er hægt að móta kúlur eða taka upp tsk af trufflublöndu og koma fyrir í miðju muffinskökunnar.
  • Þrýstið létt ofan í kökuna og skreytið síðan með kremi.

Innihald krem:

  • 80 g sæta, t.d. Sukrin Melis
  • 125 g rjómaostur í bláu boxunum MS
  • 250 ml rjómi
  • 1 tsk skyndikaffiduft (má sleppa kaffiduftinu)
  • 1 msk kakó

aðferð:

  • Þeytið saman sætu, kakó, kaffiduft og rjómaostinn.
  • Bætið rjóma saman við og skafið vel úr hliðunum á skálinni.
  • Setjið nú allt á fullt og þeytið þar til toppar myndast í kreminu.
  • Sprautið kreminu ofan á kökurnar með fallegum stút og skreytið með brómberjum og myntulaufi.