Aspassúpa frá grunni

Ég átti leið í Nettó eins og svo oft áður á leið heim úr vinnu eða öðru stússi og ætlaði svo sannarlega ekki að hafa súpu á föstudegi en þegar ég sá aspasbakkana í grænmetisdeildinni, þessa litlu krúttlegu þá stóðst ég ekki mátið og kippti með mér heim knippum af aspas. Það yrði bara súpa á föstudegi einu sinni!! Ég bakaði dásamlega bragðgóðar skonsur með súpunni, sleppti bara sætunni og þær pössuðu mjög vel með.

innihald:

  • 1 msk steikingarolía OLIFA
  • 25 g smjör
  • 1 gulur laukur
  • 700 ml soðið vatn
  • 2 kraft teningar, grænmetis eða kjúklinga
  • 150 g sellerí
  • 300 g aspas
  • 100 ml rjómi
  • salt og pipar

aðferð:

  • Steikið lauk upp úr smjöri og oliu
  • Bætið sellerí saman við og látið mýkjast í feitinni en ekki brenna við.
  • Bætið aspas saman við og soði, vatn og kraftur
  • Látið súpuna sjóða í 10 mín þar til aspasinn hefur mýkst upp.
  • Hér er hægt að nota töfrasprota til að mauka súpuna eða annarskonar matvinnsluvél
  • Bætið rjóma saman við og kryddið þar til þið eruð ánægð með bragðið.
  • Gott að bera fram með nýbökuðum skonsum eða öðru lágkolvetna brauði.

aðferð með Thermomix:

  • Setjið lauk í eldunarskálin ásamt smjöri og olíu.
  • Steikið í 3 mín / 120°/ hraði 1
  • Bætið sellerí saman við og hitið áfram í 2 mín / 120° / hraði 1
  • Aspasinn og soðið( vatnið og krafturinn) fer næst ofan í skálina og nú má sjóða súpuna í 10 mín / 100°/ hraði 2
  • Maukið næst súpuna í 30 sek ca frá hraðanum 4-8 farið varlega.
  • Bætið rjóma og kryddi saman við og hrærið stutt 2 mín / hraði 2
  • Smakkið til og berið svo fram með nýbökuðum skonsum eða öðru lágkolvetna brauði.