Sveppasúpa með timían

Sveppasúpur eru alltaf góðar ekki satt, þessi smakkast eins og á fínasta veitingastað og alveg laus við allt hveiti og þykkingarefni. Er því glúteinlaus og bragðmikil með góðri fitu. Mæli með því að baka gott lágkolvetna brauð með henni. Ég gerði í þetta sinn útgáfu af brauðstöngum og notaði Fat head uppskrift sem kom nokkuð vel út. Ég fyllti brauðið af osti, dreifði hvítlauksolíu yfir allt og kryddaði vel. Það er búið að vera brauðstangaæði á instagram eftir að Erna Hrund setti inn sína útgáfu af brauðstöngum með deiginu frá Evu Laufey, ( ekki slæmt kombó þar ) en hér er hægt að gera þetta svona semí líkt en þó lágkolvetna.

Innihald:

  • 2 box sveppir eða um 400 g
  • 4 hvítlauksrif
  • 4-6 vorlaukar
  • 50 g smjör
  • 750 ml vatn
  • 250 ml rjómi
  • 2 súputeningar, sveppakraftur
  • 250 g sveppasmurostur
  • ferskt timian
  • salt og pipar

aðferð:

  • Steikið vorlauk, hvítlauk og sveppi upp úr smjörinu.
  • Bætið við sveppasmurostinum og láti malla í nokkrar mín.
    Bætið við vatni og rjóma og kryddið með sveppakrafti, salti, pipar og timian.
  • Maukið nú með töfrasprota, má sleppa en það gerir súpuna mjög kremaða og góða. Timian gerir ótrúlega mikið fyrir súpuna og mæli með að nota ferskt krydd.
  • Þessi súpa er fiturík og saðsöm og gott að bera fram með lágkolvetna bollum eða brauði.

aðferð með thermomix:

  • Setjið sveppi og lauka í skálina. Saxið 5 sek / hraði 6
  • Bætið við smjöri og látið vélina ganga í 3 mín / hiti 90° / hraði 2
  • Skafið niður úr hliðunum og bætið sveppaosti ofan í skál, blandið 10 sek / hraði 5 og notið sleifina til að blanda öllu vel saman.
  • Bætið vatni saman við og hitið nú í 10 mín / hiti 90° / hraði 2
  • Þeytið næst 20 sek / frá hraða 6-8 þar til súpan er vel blönduð
  • Bætið rjómanum við og hrærið 2 mín / hiti 90° / hraði 2
  • Kryddið til með salti og pipar og súpan er klár.

Brauðstangir

  • 180 g mosarella ostur
  • 2 msk rjómaostur
  • 80 g möndlumjöl
  • 1 tsk edik
  • 1 egg
  • 1/2 tsk salt

aðferð:

  • Hitið osta í örbylgjuofni í 30 sek í senn, þar til þeir eru orðnir vel fljótandi. Bætið við eggi, ediki og mjöli og hrærið kröftuglega.
  • Fletjið út á plötu með smjörpappír, pikkið aðeins í deigið með gaffli.
  • Dreifið rifnum osti yfir deigið, hellið smá hvítlauksolíu yfir og kryddið með chili, hvítlauk og pipar.
  • Brjótið deigið saman eins og umslag, kryddið aftur og dreifið osti yfir ásamt olíu. Skerið laust í brauðið þvert yfir og mótið fyrir brauðstöngum en farið þó ekki alveg í gegn.
  • Bakið við 200°hita með blæstri í 10-15 mín.